На канікулах – у школьны лагер
Завяршаецца першая школьная чвэрць. Як расказала галоўны спецыяліст аддзела па адукацыі райвыканкама Вольга Шабанава, у 9 школах раёна падчас асенніх канікул будуць працаваць 6-дзённыя аздараўленчыя лагеры, у якіх адпачнуць 237 вучняў.
Для арганізацыі адпачынку будзе выдаткавана з бюджэту 6115 рублёў. Найбольшая колькасць дзяцей – 85 – будзе адпачываць у лагеры Шумілінскай СШ №1, 30 вучняў прыме школьны лагер у Мікіціхінскай СШ, 25 – у СШ №2, 20 – у Кардонскай СШ. Для дзяцей з аддаленых сельскіх населеных пунктаў будзе арганізаваны падвоз.
Дзецям не прыйдзецца сумаваць – запланаваны мерапрыемствы экалагічнай, гістарычнай, патрыятычнай накіраванасці, экскурсіі, спартыўныя мерапрыемствы. Вялікая ўвага надаецца фарміраванню бяспечных паводзін дзяцей, у гэтым выхавальнікам лагераў дапамогуць супрацоўнікі райаддзелаў унутраных спраў і па надзвычайных сітуацыях, медыкі. Свае планы на арганізацыю дзіцячага адпачынку ёсць у СДЮШАР, цэнтра дзяцей і моладзі, ва ўстановах культуры. Так што канікулы праляцяць цікава і незаўважна.
Сяргей ЕРМАЛАЕЎ.
