Перамагчы сябе і прайсці шлях воіна
У суботу, 22 мая, у раённым цэнтры дзяцей і моладзі прайшло адкрытае першынство раёна па вавінам в’ет во дао. За перамогу змагаліся каля 100 юных спартсменаў з Шуміліна, Віцебска, Лёзна і Барысава.
Вітаў удзельнікаў першынства галоўны спецыяліст райвыканкама Дзмітрый Дубоўскі, які адзначыў, што на Шуміліншчыне паспяхова развіваецца вавінам в’ет во дао, шумілінскія спартсмены годна абараняюць гонар нашага раёна на абласных, рэспубліканскіх і міжнародных стартах.
І вось дадзены старт першынству. Адным з першых на дыван выйшаў Багдан Ушал – спартсмен, які мае гучныя перамогі на рэспубліканскіх і міжнародных стартах. Паядынак з яго ўдзелам быў прыгожым і відовішчным, Багдан і яго сапернік дэманстравалі выдатную тэхніку і добрую фізічную падрыхтоўку, упэўнена можа сцвярджаць, што гэта быў бой сапраўдных майстроў.
Самы кранальны момант – паядынкі з удзелам 5- ці і 6-цігадовых спартсменаў. Іх вага да 20 кілаграмаў, пальчаткі амаль у іх рост, а на рынг выводзяць за руку старэйшыя сябры. Затое сам паядынак – гэта безліч удараў, маса эмоцый. Толькі ўхвальных слоў заслужыў юны Станіслаў Мацуганаў, у якога на першынстве адна перамога і адно паражэнне.
Было на што паглядзець і на паядынках прадстаўніц прыгожай паловы чалавецтва. Эмацыянальнасць дзяўчат добра спалучалася з тэхнікай і спартыўнай злосцю, што надавала непрадказальнасці ў баях.
Па выніках першынства восем шумілінскіх спартсменаў сталі пераможцамі: Ганна Праліч, Ульяна Багдановіч, Павел Талпегін, Ігар Пальвінскі, Багдан Ушал, Ягор Мацуганаў, Арсеній Саўчанка і Глеб Кулецкі. У камандным заліку першае месца выйгралі шумілінскія спартсмены (трэнер Святлана Бараноўская), другое месца ў спартыўнага клуба «Хорт» з Барысава, трэцяе – у спартыўнага клуба «SLT» з Віцебска.
Аляксандр ШЭДЗЬКО.
Апублікавана ў №39 ад 25.03.3021 г.
