Рэканструкцыя цэнтральнай кацельні
– Апошняя буйная рэканструкцыя на цэнтральнай кацельні ў Шуміліне праводзілася ў 2007 годзе, – пачаў размову начальнік цэнтральнай кацельні і кацельні ТМА Сяргей Блізнец. – Тады мы першымі ў вобласці ўстанавілі два ацяпляльныя катлы на шчапе, кожны з іх магутнасцю па 2 МВт. З таго часу на кацельні працавалі два катлы на мясцовых відах паліва (МВП) і два газавыя катлы, якія выкарыстоўваліся пераважна ў зімовы час.
Шматгадовая практыка выкарыстання ацяпляльных катлоў на мясцовых відах паліва паказала сваю эфектыўнасць. «Спажыўцы цеплавой энергіі, а гэта кожны з нас, розніцы не адчувалі, якія катлы працавалі, – расказвае галоўны інжынер УП ЖКГ Максім Русецкі. – А для прадпрыемства выкарыстанне газавых катлоў абыходзілася вельмі дорага. Нашы спецыялісты падлічылі, што выкарыстанне толькі катлоў на шчапе дазволіць сэканоміць значныя сродкі. Да ўсяго, мы не будзем залежныя ад імпартнага газу».
На мінулым тыдні на цэнтральную кацельню быў дастаўлены кацёл магутнасцю 3 МВт, які працуе на МВП. Першы кацёл, які з усімі прыстасаваннямі і прыладамі важыць амаль 50 тон, ужо ўстанавілі на месца. Чакаецца, што бліжэйшым часам на кацельню даставяць і другі такі кацёл. «Улетку, калі цеплавая энергія ідзе толькі на падагрэў вады, будуць працаваць два катлы па 2 МВт,– расказвае Максім Русецкі. – Новыя катлы будуць выкарыстоў-вацца падчас ацяпляльнага сезона: калі да ацяплення падключаюць сацыяльныя аб’екты – пачынае працаваць трэці кацёл, і, нарэшце, калі ўключаць жыллёвы фонд, то запрацуюць усе катлы. Газавыя катлы таксама застануцца на кацельні, яны будуць своеасаблівай падстрахоўкай на нейкія надзвычайныя выпадкі».
Як паведаміў Сяргей Блізнец, мантаж новага катла ідзе поўным ходам. Кацельня працуе ў штатным рэжыме. «Катлы да сістэмы плануем падключыць у час прафілактычных работ на кацельні, якія адбудуцца ў канцы жніўня-пачатку верасня, – расказвае начальнік кацельні. – Дарэчы, каэфіцыент карыснага дзеяння новага катла дасягае 94%».
Сёлетняя рэканструкцыя кацельні ўключае не толькі ўстаноўку новых катлоў. Таксама дэманціраваны адкрытыя ўчасткі цепласетак ля кацельні і завяршаюцца работы па ўкладцы новай падземнай цепласістэмы.
Будуць взаменены трубы-цеплавыхады з кацельні. «Гэтыя трубы састарэлі маральна і фізічна, – адзначае Максім Русецкі. – Для новых цеплавыхадаў набылі спецыяльныя ПІ-трубы дыяметрам 530 мм, іх замену пачынаем на наступным тыдні».
Падчас сёлетняй рэканструкцыі кацельні пабудуюць новы навес для шчапы, пад якім можна будзе захоўваць двухтыднёвы запас паліва. Да слова, улетку нкацельня спальвае да 20 кубоў шчапы штодзень, узімку – у тры разы больш.
Аляксандр ШЭДЗЬКО.
Апублікавана ў №63 ад 14.08.2020 г.
Сяргей Блізнец і Максім Русецкі абмяркоўваюць работы па рэканструкцыі кацельні.
