Папярэдзіць, каб потым не тушыць
Рэйды па папярэджанні фактаў выпальвання сухой расліннасці рэгулярна ладзяцца супрацоўнікамі раённага аддзела па надзвычайных сітуацыях. Лепш папярэдзіць, каб потым не тушыць і не канстатаваць сумныя вынікі неабдуманых дзеянняў “падпальшчыкаў” – з такой задачай выязджаюць у вёскі раёна ратавальнікі, праводзяць растлумачальную прафілактычную работу з вяскоўцамі.
У адзін з такіх рэйдаў у населеныя пункты Сіроцінскага сельсавета – вёскі Бываліна, Сіроціна, Мосарава і Тропіна – у прайшоўшыя выхадныя адправіліся таксама работнікі РАУС і раённай газеты.
Надвор’е выдалася не вельмі спрыяльным для навядзення парадку, таму на падворках сяльчан было ціха, дыму ад кастроў відаць не было. Гаспадары, напэўна, добра разумеюць, што ў моцны вецер лепш не гуляць з агнём – вельмі небяспечна. Тым не менш, удзельнікі рэйду нагадалі пра адказнасць за выпальванне сухой расліннасці альбо непрыняцце мер па ліквідацыі палаў, расказалі, як правільна і бяспечна разводзіць кастры і што чакае за іх развядзенне ў забароненых месцах.
Адной з задач удзельнікаў рэйду было таксама выяўленне нядобраўпарадкаваных падворкаў, як патэнцыйных ачагоў узгаранняў.
Алена КАРПУШЭНКА.
Апублікавана ў №33 ад 30.04.2020 г.
