За парты шумілінскіх школ селі 1838 вучняў, з іх 188 першакласнікаў

Абноўленым дваром, новымі спартыўна-гульнявымі пляцоўкамі сустрэла вучняў буйнейшая ўстанова адукацыі раёна – СШ №1 імя Героя Савецкага Саюза П. А. Акуцыёнка г. п. Шуміліна. Асабліва хвалюючым стала свята першага званка для самых маленькіх вучняў – 98 першакласнікаў упершыню пераступілі парог сярэдняй школы №1.

– 600 тысяч рублёў укладзена ў абнаўленне школьнага двара. Для школьнікаў уладкаваныя сучасныя спартыўныя пляцоўкі, якія дазволяць праводзіць урокі на новым узроўні, – сказаў, выступаючы на ўрачыстай лінейцы, старшыня райвыканкама Віктар Гутараў. – І гэта не апошняя кропка ў рамонце галоўнай установы адукацыі раёна, абнаўленне школы будзе працягвацца і надалей”.

Віктар Сяргеевіч павіншаваў вучняў і педагогаў з пачаткам вучобы, пажадаў плённай работы, выдатных адзнак і высокіх дасягненняў, падкрэсліўшы, што вучоба – гэта складаная і адказная работа для ўсіх. Кіраўнік раёна ўручыў дырэктару школы Наталлі Мясаедавай сертыфікат на 13 тысяч рублёў на набыццё неабходнага абсталявання.

І вось празвінеў першы званок, даўшы старт вялікаму паходу за ведамі.

*   *   *

Для педагогаў і 82 вучняў Кардонскай сярэдняй школы Дзень ведаў пачаўся таксама з урачыстай лінейкі, віншавальных слоў і падарункаў. Так, старшыня раённага Савета дэпутатаў Ірына Новікава прыехала на свята першага званка з сертыфікатам ад раённага выканаўчага камітэта на суму 9500 рублёў на ўмацаванне матэрыяльна-тэхнічнай базы школы.  Ірына Мікалаеўна падзякавала ўсяму калектыву Кардонскай школы за выдатную падрыхтоўку да новага навучальнага года, за работу і пажадала ўсім поспехаў.

Міністэрства па надзвычайных сітуацыях на чале з міністрам Уладзімірам Вашчанкам курыруе валейбол, таму і ўдзяляюць выратавальнікі асаблівую ўвагу папулярызацыі гэтага віду спорту ў школах. Начальнік раённага аддзела па надзвычайных сітуацыях Андрэй Сасновіч прэзентаваў навучальнай установе спортінвентар – валейбольны мяч і валейбольную сетку, пажадаўшы не толькі атрымліваць веды, але і ўмацоўваць фізічны стан і весці здаровы лад жыцця.

Дырэктар мясцовага сельскагаспадарчага прадпрыемства Валянціна Лабейка прывезла дзецям, якія дапамагалі летам гаспадарцы, грашовыя прэміі, уручыла падарункі і першакласнікам. Усяму калектыву Валянціна Уладзіміраўна паабяцала далейшую пасільную дапамогу і падтрымку.

Першы званок, першы ўрок – новы навучальны 2019/2020 год стартаваў. Удачы і поспехаў усім!

Сяргей ЕРМАЛАЕЎ.

Алена КАРПУШЭНКА.

Надрукавана ў №69 ад 03.09.2019 г.