З карысцю для школы і для сябе
Многія школьнікі, асабліва старэйшых класаў, імкнуцца скарыстаць лета не толькі для адпачынку, але і каб заробіць кішэнных грошай.
Гэта і бацькам прыемна: не гультай расце, і настаўнікам спакойна – не швэндаецца падлетак абы-дзе ў пошуках “прыгод”, і грамадству карысна – падрастае новае працавітае пакаленне.
Другасная занятасць і накіравана на тое, каб даць падлеткам магчымасць папрацаваць на канікулах. Карысць двайная: школьнікі могуць няблага зарабіць, школа – атрымаць дадатковыя грошы для вырашэння пэўных праблем.
Як паведамілі ў аддзеле адукацыі, сёлета работа ў рамках другаснай занятасці арганізавана ў дзесяці школах раёна. Дзеці займаюцца рамонтам школьнай мэблі, шыюць пасцельную бялізну, даглядаюць кветнікі, добраўпарадкоўваюць прышкольныя ўчасткі, займаюцца рамонтам класаў. Дзяржава выдае грошы на закупку неабходных матэрыялаў, інструментаў, на зарплату вучням.
Па словах спецыяліста гаспадарчай групы РАА А. А. Гаўрылава, усяго ў школах па другаснай занятасці задзейнічаны 87 чалавек, агульная сума выдаткаў – каля 60 мільёнаў рублёў. Самую вялікую суму грошай плануюць асвоіць ў Обальскай СШ – 14,2 мільёна рублёў. Тут ужо адрамантавалі 45 камплектаў вучнёўскай мэблі і шыюць пасцельную бялізну для дзіцячых садоў раёна.
Нездарма паміж школамі вядзецца барацьба за ўваходжанне ў праграму другаснай занятасці. Гэта дазваляе вырашаць многія практычныя пытанні.
Сяргей ПАЎЛАЎ.
Надрукавана ў №48 ад 28.06.2011 г.
