А. П. Быкаў: “Упершыню ўзводзім так многа шматкватэрнага жылля. І адступаць не збіраемся…”
Па тэме будаўніцтва жылля сёння размоў шмат. І даволі вострых. Асабліва калі тычыцца якасці: усё ж спажывец на кон ставіць не такую і бяскрыўдную суму грошай, таму хочацца яму жылля дабротнага, каб не абіваць пасля парогі розных інстанцый, не псаваць сабе нервы. “Кон” жа той, дарэчы, з цягам часу ўсё больш салідны: калі вясной 2009 года плацілі за “квадрат” 2 мільёны 100 тысяч (пасля пераразлікаў па факту выдаткаў да 1 мільёна 700 тысяч), то сёлета квадратны метр жыллёва-будаўнічага кааператыва ў Обалі адразу вырас да 2 мільёнаў 700 тысяч рублёў. Вядома, і тут у рэшце рэшт пры здачы кааператыва цана “ўсохне”, тым не менш ад такой лічбы некаторых членаў ЖБК сёння агарнуў жах.
— А што жахацца? — парыруе інжынер тэхнагляду КУП “Шумілінскае ўпраўленне капітальнага будаўніцтва” І. М. Бураў. — З цягам часу таннейшым “квадрат” наўрад ці будзе. У Обалі ў кааператыўнага дома падмурак з мноства паляў. А гэта немалыя выдаткі. Таму і дарагі….
Тым не менш настрой у абальчан, мякка кажучы, далёка не аптымістычны: двухпакаёвая кватэра будзе каштаваць сям’і амаль 160 мільёнаў рублёў. За такія грошы можна купіць жыллё ў Віцебску, і нават не ў самым малапрэстыжным раёне. А між тым ПМК-70 як падрадчык работы ўжо распачаў: забіты палі, вядзецца мантаж падмурка. Увязаліся і ў трэці кааператыўны дом у раёне СШ № 2 на 40 кватэр. А пакуль будаўнічая брыгада В. Р. Чарвянкова выводзіць пад дах сцены другога ЖБК у гэтым жа мікрараёне. Паралельна, на першым паверсе, ідзе атынкоўванне пакояў.
— Упершыню за апошнія 15 гадоў узводзім так многа шматкватэрнага жылля, — зазначае дырэктар ПМК-70 А. П. Быкаў. — Адступаць не збіраемся, хаця пачынаць было нялёгка. Па сутнасці вучыліся будаваць, апраўдваць пачэсную прафесію будаўніка…
Дарэчы, “шматкватэрка” ставіць будаўнікоў пад асаблівае напружанне: напрыклад, 48-кватэрны жылы дом, дзе цяпер заканчваецца кладка, трэба па праекце здаць за 8 месяцаў. Адна справа выкласці сцены з адных сілікатных блокаў, іншая, калі шмат кладкі з цэглы. Тым не менш не ўкладзешся ў тэрміны — не атрымаеш усяго шлейфа матэрыяльных даплат. Адсюль і свядомае жаданне дырэктара А. П. Быкава патроху, але настойліва ўзбуйняць калектыў мехкалоны. Сёння працуе тут без малога 300 чалавек.
За мінулы год ПМК-70 здала тры шматпавярховыя жылыя дамы, не менш напружаная праграма ў гэтым плане сёлета. У раёне нацэлены ўвесці за год не менш як 9 тысяч квадратных метраў жылля, львіная доля яго ляжа на плечы будаўнікоў ПМК. Увесь гадавы аб’ём мантажна-будаўнічых работ ПМК-70 цягне на 13 мільярдаў рублёў. У 2010 годзе асвоілі менш — 11 мільярдаў 870 мільёнаў рублёў. Так што з аб’ёмамі прырастуць. Расце і зарплата. За мінулы год на будаўніка ў сярэднім было налічана 1 мільён 400 тысяч рублёў. У муляраў яна яшчэ больш салідная — даходзіць да двух мільёнаў. Дарэчы, пра муляраў. Іх у мехкалоне 45, калектыў вырас за апошнія тры гады на 16 чалавек. Гэта факт, які радуе і абнадзейвае. Свядома пашыраюць тут рады муляраў, не забываючы, аднак, і аб паляпшэнні іх прафесійнай маркі. Сёння амаль палова муляраў — сапраўдныя майстры. Яны выкладваюць самыя складаныя элементы дома. Ёсць і былыя “масквічы”, вяртаюцца і яны з заморскіх ваяжоў, хаця не вельмі ахвотна: зарплата не тая.
Нямала ў ПМК-70 маладых і здольных будаўнікоў. У ліпені 2010 года наша брыгада брала ўдзел у конкурсе муляраў, які праводзіўся ў Бешанковічах. Тыдзень працавалі брыгады па лініі Віцебсксельбуда на ўзвядзенні аднаго з ЖБК. Шумілінская каманда на чале са старшым прарабам В. А. Новікавым перамагла, прывезла дыпломы і прэмію. Не менш прыемныя навіны прыходзілі ў Шумілінскую мехкалону і тры, і два гады назад: сярод ПМК таго ж аб’яднання па выніках работы нашы землякі выходзілі пераможцамі, летась былі трэцімі з адзінаццаці такіх жа калектываў. Дастойна, ганарова. Але на лаўрах не спачываюць. У ПМК-70 абнаўляюць тэхніку, набываюць новую, больш прадукцыйную. Парадавалі нядаўна тынкоўшчыкаў, ім купілі новую станцыю. Мы бачылі, як на шматкватэрны дом у раёне СШ № 2 з базы проста не спраўляліся дастаўляць раствор — з такім настроем і ўздымам працавала брыгада. Неўзабаве прыбудзе на стан ПМК і 22-мятровая вышка. Яна арганізацыі патрэбна, як паветра. Па лізінгу закупілі новы дрэваапрацоўчы станок, які “выганяе” і талковую падлогавую дошку, і вагонку.
Па выніках работы за 2010 год ПМК-70 атрымала 402 мільёны прыбытку. На думку А. П. Быкава, лічба даволі сціплая, аднак жа сам факт, што ёсць чысты даход, гаворыць пра многае. Тут намераны развіваць поспех, тым больш, што набілі, даруйце, руку на шматкватэрных жылых дамах. І што важна: перамаглі гнятлівае пачуццё “правінцыялізму”, далі зразумець, што і яны — не лыкам шыты.
Мікалай МАРОЗ.
Надрукавана ў №27 ад 12.04.2011 г.
