Шумилинская «Разынка» предлагает рецепты новогодних блюд

Пяць рэцэптаў ад “Разынкі”
Удзельнікі народнага клуба аматараў нацыянальнай беларускай кухні “Разынка” Дома рамёстваў (кіраўнік Н. А. Сцержанкова) прапаноўваюць для чытачоў раённай газеты рэцэпты да навагодняга стала.
Салата “Закусачная”
Для салаты спатрэбіцца: 150 грамаў салямі, 200 грамаў “расійскага” сыру, 2 свежыя агуркі сярэдніх памераў, маянэз.
Салямі, сыр і гуркі парэзаць дробнай саломкай. Салату заправіць маянэзам.
Рыба пад марынадам
Для гэтай стравы спатрэбіцца: 2 рыбіны свежамарожанага мінтая, 2-3 рэпчатыя цыбуліны, 2-3 морквіны, таматны соус, алей.
Мінтай зварыць і адабраць ад касцей. Рыбу выкласці на талерку. Пацерці на тарцы моркву, дробна парэзаць цыбулю і падсмажыць на алеі. Даць астыць і выкласці ўсё на асобную талерку, заправіць таматным соусам. Потым гэтай цыбулева-маркоўнай запраўкай змазаць тоўстым слоем рыбу і паставіць у халадзільнік. Пажадана на ноч – тады рыба насыціцца і будзе вельмі смачнай. Перад падачай на стол страву можна пасыпаць здробненым сырам.
Рулецікі
Свініну парэзаць на тонкія скрылькі і адбіць. На кожны кавалачак пакласці смажаныя грыбы з цыбуляй, скруціць у рулецікі, замацаваць шпажкай. Абсмажыць у алеі, а потым патушыць некалькі хвілін у вяршках. Перад падачай на стол можна пасыпаць свежым кропам.
Блінчык арыгінальны
Арыгінальнасць у тым, што пячэцца ўсяго адзін вялікі тонкі блін (2 яйкі плюс крухмал). Потым блін рэжацца саломкай. У гэтую ж міску з парэзаным блінам дадаём 300 грамаў вяндліны (таксама рэжацца саломкай) і 2-3 марынаваныя цыбуліны. Для марынаду бяром 8 сталовых лыжак 9%-га воцату і 5 сталовых лыжак вады. Трымаем цыбулю, парэзаную паўкольцамі, у гэтым растворы хвілін 10-15. Потым усе інгрэдыенты перамешваем, запраўляем маянэзам. Атрымліваецца смачная блінная салата.
Пірог “Дарагім гасцям”
Гэты пірог будзе дарэчы 1 студзеня, калі есці не хочацца. Ну, а пачаставаць чаем гасцей – гэта святое.
Для пірага спатрэбіцца пачак маргарыну, 2 яйкі, 1 шклянку цукру, 3 шклянкі мукі,  2 ст.лыжкі смятаны, 0,5 ч. л. соды, крыху солі, жменька разынак, карыца, ванілін.
Смятану перамяшаць з содай, дадаць растоплены маргарын, яйкі, цукар, крыху солі. Паступова дадаём муку і добра перамешваем. Цеста павінна атрымацца шчыльным. Потым яго кладзём у цэлафанавы пакет і ставім на паўгадзіны ў халадзільнік.
Пасля цеста трэба раскатаць на корж таўшчынёй у  1 см. З бакоў яго абразаем, каб корж быў роўным. Палоскі з цеста адкладваем – яны яшчэ спатрэбяцца. Пячэм корж прыкладна паўгадзіны  пры тэмпературы 180 градусаў. Пакуль пірог пячэцца, робім начынку: здрабняем на буйной тарцы 5 ачышчаных яблыкаў, дадаём па смаку цукар і апараныя кіпнем разынкі. Усё перамешваем і выкладваем на пірог. Зверху любым узорам замацоўваем палоскі з цеста і ставім у духоўку хвілін на 20. Як толькі зверху пірог набудзе залацісты колер, ён гатовы.
Рэцэпты запісала Ларыса КІСЯЛЁВА.
Надрукавана ў № 100 ад 24.12.2015 г.