Водпуск у яе будзе творчым
Многія жыхары раёна ведаюць Вольгу Іванаўну Пусянкову з аграгарадка Слабада па яе захапленнях. Яе выстава з бісеру кожны год радуе нас на Сіроцінскім падворку падчас правядзення свята «Родная зямля». Прычым, з году год колькасць вырабаў павялічваецца, яны становяцца больш дасканалымі і вытанчанымі.
“Каб займацца бісерапляценнем, трэба жаданне і цярплівасць”, – кажа Вольга Іванаўна. Сабраць у адзінае цэлае сотні галінак і пялёсткаў, надаць ім форму жывых кветак або дрэва без цікавасці да справы, без фантазіі немагчыма.
Жанчына авалодала рознымі тэхнікамі пляцення. Напачатку сядзела начамі, не магла адарвацца ад любімай справы. А цяпер крыху астыла, кажа, што бісерапляценне – гэта вялікая нагрузка для вачэй. Але творчасць не закінула, памяняла захапленне на больш цікавыя і навейшыя.
У доме В. І. Пусянковай шмат прыгожых вырабаў з фаамірану – матэрыялу, які яшчэ называюць порыстай гумай або штучнай замшай. З яго робіць кветкі, заколкі, бранзалеты, брошкі, лялек…
“Разаграваю матэрыял цеплынёй рук. Каб надаць пялёстку падабенства з натуральным, крыху расцягваю матэрыял, пры неабходнасці ствараю хвалістыя краі, – расказвае жанчына. – Фааміран прыемны і мяккі, ён цудоўна трымае форму і не баіцца вады. Таму вырабы можна смела мыць – яны не згубяць сваёй формы”. Назіральнасць і прыроджанае пачуццё гармоніі дапамагаюць Вользе Іванаўне рабіць ружы, нарцысы і іншыя кветкі нібыта жывыя.
А нядаўна яна занялася вырабам мыла. Не думайце, што яно стала дэфіцытам у нашых магазінах. Проста зрабіць яго сваімі рукамі, са спецыфічным пахам – справа цікавая і захапляльная. Жанчына купляе мыльную аснову, аддушку, фарбавальнікі і формачкі. Дадае эфірныя алеі або лекавыя травы. Сяброўкі, якім на 8 Сакавіка падарыла ўласнае мыла, былі проста ў захапленні.
В. І. Пусянкова асвоіла і такі від творчасці, як дэкупаж – гэта тэхніка дэкарыравання розных прадметаў малюнкамі ці арнаментам. Скура і метал, кераміка і тэкстыль, дрэва, бетон і шкло – няма такой паверхні, на якой бы нельга было выканаць дэкупаж. Са старых кніг Вольга Іванаўна вырабляе вельмі арыгінальныя шкатулкі.
Захапілася В. І. Пусянкова і палімернай глінай, з якой можна рабіць і біжутэрыю, і мініяцюрныя скульптуры, і розныя сувеніры. Авалодала японскай тэхнікай канзашы – гэта мастацтва па вырабу кветак з шаўковых стужак.
Думаецца, наперадзе ў В. І. Пусянковай яшчэ шмат захапленняў. Жанчына (яна працуе эканамістам у КУСГП «Сіроцінскі») з нецярпеннем чакае водпуску і дакладна ведае, што ён будзе творчым. Застаецца пажадаць ёй новых узлётаў і дасягненняў.
Ларыса ЗАЙЦАВА.
Надрукавана ў №45 ад 12. 06. 2015 г.
Ольга Пусенкова и её увлечения
